如果居所有僭建或非法建築物等，保險公司有權唔承保。

當居所樓齡達三十年或以上時，部分保險公司或會要求投保人先對有關住宅進行個別評核，再決定承唔承保。

除咗樓齡同面積嘅因素外，如居所係獨立屋或村屋，投保人亦須個別向保險公司查詢有關保障額同保費。

市面上嘅家居保險普遍提供「家居裝修」基本保障，假如家中有假天花、木地板或房門等後加嘅裝修陳設，而因意外導致損毀，將會獲得賠償。不過有關保障只限於已完成裝修工程嘅居所。

但部分家居保險產品設有「維修期間財物保障」，保障受保人嘅單位喺維修或裝修期間因意外引致嘅家居財物損毀。

目前唔少租約上已列明租客需為租用單位內固定裝置及陳設負責，一旦發生火災、水浸等意外而遭受損毀，租客或需向業主賠償。

如果租客一早購買家居保險，就可以將有關風險轉介俾保險公司。

火險保險產品主要提供因意外所造成嘅樓宇結構損毀、更換，甚至重建嘅費用賠償。

家居保險就保障家中財物損毀嘅風險，可以獲得因財物損毀所引致嘅費用賠償。

總結，火險同家居保險分別可保障家居「外殼」結構同「內攏」財產物品。